ღია შეხვედრები მოსახლეობასთან გრძელდება. ანზორ ბოლქვაძე შუახევის მუნიციპალიტეტის სოფელ დღვანისა და ზამლეთის ადმინისტრაციულო ერთეულის მოსახლეობას შეხვდა. მან მოქალაქეებს ღია შეხვედრის ფორმატი გააცნო და მათი წინადადებები პირადად მოისმინა.

შეხვედრაზე განხილული იქნა ინფრასტრუქტურის განვითარებისათვის განხორციელებული და დაგეგმილი პროექტები, სოციალური პროგრამები, ის ღონისძიებები, რომლებიც მოსახლეობის მოთხოვნისა და საჭიროების შესაბამისად განხორციელდა. განხილული იქნა მომავალი წლის ბიუჯეტში გათვალისწინებული პრიორიტეტული მიმართულებები.

„ბატონებო, თქვენი მხრიდან დასახელებულ პრობლემურ საკითხთა შორის გამოიკვეთა სოფელ გოგნიაურისა და კრიახიძეების შეშით მომარაგების საკითხი, ითქვა თქვენი და გარემოს დამცველთა პრობლემური დამოკიდებულების შესახებ. მე გეთანხმებით, რომ მთაში მცხოვრები ოჯახებისთვის, შეშით მომარაგება სასიცოცხლოდ მნიშვნელოვანია, ჩემის მხრივ მცდელობას არ დავაკლებ, რომ აღნიშნული საკითხი დროულად იქნას განხილული და მოგვარებული“, - განაცხადა ანზორ ბოლქვაძემ.

შეხვედრის შემდეგ ანზორ ბოლქვაძე სოფელ დღვანში, სოლიხევის ღელეზე ახალი ხიდის გახსნას დაესწრო.

შეხვედრაზე იმყოფებოდნენ აჭარის ა.რ. სამინისტროებისა და დეპარტამენტების წარმომადგენლები.