ანზორ ბოლქვაძე 27 ოქტომბერს ქედის, ხოლო დღეს ხულოს მუნიციპალიტეტში საზოგადოებრივი ცენტრების გახსნას დაესწრო.

საზოგადოებრივი ცენტრები ხულოსა და ქედაში საქართველოს იუსტიციის მინისტრმა, თეა წულუკიანმა გახსნა.

რეგიონში არსებულ, მუხაესტატეს, ქობულეთის, ჩაქვის და შუახევის საზოგადოებრივ ცენტრებს, ხულო და ქედაც შეემატა.

საზოგადოებრივი ცენტრი მომხმარებელს მრავალფეროვან სერვისს, გამარტივებულ პროცედურებს, საინფორმაციო ტექნოლოგიების ხელმისაწვდომობას და თანამედროვე ინფრასტრუქტურას სთავაზობს, მოსახლეობა 200-ზე მეტ სახელმწიფო და კერძო სერვისს მუნიციპალიტეტიდან გაუსვლელად მიიღებს.

ცენტრში არსებული სერვისებით სარგებლობა ადგილობრივ მოსახლეობასთან ერთად სტუმრებსაც შეეძლებათ.

მომხმარებელს ადგილიდან გაუსვლელად შეუძლია მიიღოს პასპორტი და პირადობის მოწმობა, განახორციელოს მიწის, უძრავი ქონების რეგისტრაცია, მიიღოს საკუთრებასთან დაკავშირებული განაცხადი, დაარეგისტრიროს ქორწინება, სოციალურად დაუცველი ოჯახის ქულის მინიჭების სერვისი და სხვა. ამავე საზოგადოებრივ ცენტრში მოქალაქეებს პრობაციის ეროვნული სააგენტოს მომსახურებით სარგებლობაც შეეძლებათ.

საზოგადოებრივ ცენტრში მოწყობილია უახლესი ტექნიკით აღჭურვილი ბიბლიოთეკა. ყველასათვის ხელმისაწვდომი იქნება „მაგთისა“ და „ლიბერთი ბანკის“ მომსახურება.

ხულოში საზოგადოებრივი ცენტრის გახსნის ღონისძიებას ესწრებოდნენ აჭარის მთავრობის თავმჯდომარე თორნიკე რიჟვაძე, მეზობელი და ადგილობრივი თვითმართველობის პირველი პირები, მოწვეული სტუმრები და მოსახლეობა.