ანზორ ბოლქვაძე მასწავლებელთა საერთაშორისო დღის კვირეულის ფარგლებში შუახევის მუნიციპალიტეტის მერიაში, საპენსიო ჯილდოზე წარდგენილ და ახალდამწყებ პედაგოგებთან შეხვედრას დაესწრო. 

ღონისძიება აჭარის ა.რ. განათლების, კულტურის, სპორტის სამინისტროს და შუახევის მუნიციპალიტეტის თვითმმართველობის ინიციატივით გაიმართა. შეხვედრაზე იმყოფებოდნენ როგორც ახალდამწყები, ისე დამსახურებული მასწავლებლები. 2019-2020 სასწავლო წელს შუახევის მუნიციპალიტეტის სოფ. ინწკირვეთის, ბრილის, გოგაძეების, წაბლანის საჯარო სკოლებიდან სასწავლო პროცესი დატოვა და ჯილდოს მიღებაზე თანხმობა განაცხადა 63 პედაგოგმა. ამის შემდეგ სკოლებმა 21 მასწავლებლის სახით ახალი შევსება მიიღო.

„დღეს მომეცა საშუალება მოვეფერო ამ დიდებულ ადამიანებს, ახალდამწყებ მასწავლებლებს წარმატებულ და ნაყოფიერ მუშაობას ვუსურვებ მომავალი თაობების აღზრდისა და განათლების საპასუხისმგებლო საქმეში, საპენსიო ჯილდოზე წარდგენილ, ჩვენს ღვაწლმოსილ მასწავლებლებს მინდა მოკრძალებული მადლობა გადავუხადო იმ ფასდაუდებელი შრომისა და დამსახურებისათვის, რაც მათ წლების განმავლობაში უანგაროდ, დიდი სიყვარულითა და პასუხისმგებლობით გაუწევიათ თაობების ინტელექტუალური თუ პიროვნული ჩამოყალიბებისათვის“, - განაცხადა ანზორ ბოლქვაძემ.

შეხვედრას ესწრებოდნენ აჭარის ა. რ. განათლების, კულტურისა და სპორტის მინისტრი მაია ხაჯიშვილი, შუახევის მუნიციპალიტეტის მერი ფრიდონ ბოლქვაძე, რესურსცენტრისა და ადგილობრივი თვითმმართველობის წარმომადგენლები.