ეკა ჭიჭინაძე სომხეთის ელჩს შეხვდა
ქართულ-სომხური კულტურული ურთიერთობების გაღრმავებაზე იმსჯელეს პარლამენტის კულტურის კომიტეტის თავმჯდომარის პირველმა მოადგილემ ეკა ჭიჭინაძემ და სომხეთის რესპუბლიკის საგანგებო და სრულუფლებიანმა ელჩმა აშოტ სმბატიანმა.
შეხვედრაზე სომხეთის ელჩმა საქართველოში გამოფენის ორგანიზებასთან დაკავშირებით ინიციატივა გამოთქვა. მისი თქმით, გამოფენა ქართველი და სომეხი არტისტების - სოფიკო ჭიაურელისა და ფრუნზიკ მკრტიჩიანის შემოქმედებას მიეძღვნება. პროექტის ფარგლებში წარმოდგენილი იქნება ორივე არტისტის საზოგადოებისთვის უცნობი, უნიკალური ფოტოები, რომლებიც მათი შემოქმედებითი ცხოვრების საინტერესო მომენტებს ასახავს.
კომიტეტის თავმჯდომარის პირველმა მოადგილემ ინიციატივისადმი სრული მხარდაჭერა გამოხატა და აღნიშნა, რომ მსგავსი ღონისძიებები კულტურისა და ხელოვნების სფეროში ორ ქვეყანას შორის არსებულ მეგობრულ ურთიერთობებს კიდევ უფრო გააძლიერებს.
მხარეებმა ასევე განიხილეს მომავალი თანამშრომლობის გეგმები. აღინიშნა, რომ ერთობლივი პროექტები კულტურულ დიალოგს და ისტორიული მემკვიდრეობის დაცვას მნიშვნელოვნად შეუწყობს ხელს.
