საქართველოს პარლამენტის აგრარულ საკითხთა კომიტეტის თავმჯდომარე გელა სამხარაული ლატვიის საგანგებო და სრულუფლებიან ელჩს საქართველოში ედიტე მედნეს შეხვდა.

შეხვედრაზე საუბარი შეეხო ორ ქვეყანას შორის ურთიერთობის გაღრმავებას, მათ შორის, ეკონომიკური კავშირების ხელშეწყობასა და განვითარებას.

„ლატვიის მიერ საქართველოს ტერიტორიული მთლიანობის და საერთაშორისო ასპარეზზე მხარდაჭერისთვის ელჩს მადლობა გადავუხადე. შეხვედრაზე ჩვენს ქვეყნებს შორის თანამშრომლობაზე ვისაუბრეთ, მათ შორის, საქმიანობის იმ მიმართულებაზე, რომელიც სოფლის მეურნეობასთან არის დაკავშირებული. ჩვენი ერთ-ერთი პრობლემა უკავშირდება სოფლის მეურნეობის სფეროში ახალ ტექნოლოგიებთან მიმართებაში არასათანადო განათლებას. ამ მხრივ მნიშვნელოვანია, რომ ქართველმა სტუდენტებმა ლატვიის უმაღლეს სასწავლებლებში მიიღონ ცოდნა და გამოცდილება, რაშიც ელჩმა დახმარება აღგვითქვა. შევიმუშავეთ შესაბამისი სამოქმედო გეგმა. ვიმედოვნებ, რომ ნაყოფიერი თანამშრომლობა გაგრძელდება“, - განაცხადა გელა სამხარაულმა.