გელა სამხარაული ლიეტუვის ელჩს შეხვდა
აგრარულ საკითხთა კომიტეტის თავმჯდომარე გელა სამხარაული ლიეტუვის საგანგებო და სრულუფლებიან ელჩს, ანდრიუს კალინდრას შეხვდა.
შეხვედრაზე მხარეებმა ორ ქვეყანას შორის არსებული ურთიერთობები მიმოიხილეს და განსაკუთრებული აქცენტი აგრარულ სფეროში თანამშრომლობის მიმართულებებზე გაამახვილეს.
შეხვედრაზე აღინიშნა, რომ ქართველი ფერმერების ცნობიერების ამაღლების მიზნით მნიშვნელოვანია ლიეტუვის გამოცდილების გაცნობა და გაზიარება, ამისათვის კი აუცილებელია თანამშრომლობის გაღრმავება და სასწავლო ვიზიტების განხორციელება.
„ლიეტუვის ელჩთან საპარლამენტთაშორისო ურთიერთობებზე საუბრისას აღინიშნა, რომ მომავალ თვეში, ლიეტუვის პარლამენტის აგრარულ საკითხთა კომიტეტის თავმჯდომარე საპარლამენტო დელეგაციასთან ერთად საქართველოს ეწვევა. შეხვედრაზე სამომავლო ვიზიტის საკითხები განვიხილეთ და შევთანხმდით, რომ ჩვენი კოლეგების შეხვედრები გაიმართება საკანონმდებლო და აღმასრულებელი ხელისუფლების წარმომადგენლებთან. ვიზიტის ფარგლებში ასევე იგეგმება საგანმანათლებლო დაწესებულებებში სტუმრობა, სადაც საუბარი შეეხება სტუდენტების და პროფესორ-მასწავლებლების გაცვლითი პროგრამების მომზადების საკითხებს“,- განაცხადა გელა სამხარაულმა.
კომიტეტის თავმჯდომარემ საქართველოს მიმართ გამოხატული მხარდაჭერისთვის ლიეტუველ ხალხს და მთავრობას მადლობა გადაუხადა.
შეხვედრის დასასრულს გელა სამხარაული და ანდრიუს კალინდრა სამომავლო თანამშრომლობის მიმართულებებზე შეთანხმდნენ.
