განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძე და „ქართული ოცნება-დემოკრატიული საქართველოს“ საბურთალოს რაიონის დელეგატი აკაკი ალადაშვილი საბურთალოს რაიონში საჯარო სკოლებს ესტუმრნენ.

დეპუტატები 161-ე, 64-ე, მე-60, 195-ე და პირველ ექსპერიმენტულ ზოგადსაგანმანათლებლო დაწესებულებებს ესტუმრნენ, სკოლების ინფრასტრუქტურა დაათვალიერეს და მათ საჭიროებებს გაეცნენ.

„საქართველოს პარლამენტი, განათლების, მეცნიერებისა და ახალგაზრდობის სამინისტროსთან და ადგილობრივი ხელისუფლების წარმომადგენლებთან ერთად აგრძელებს თბილისის რაიონების ზოგადსაგანმანათლებლო დაწესებულებებში სასკოლო ინფრასტრუქტურის გაცნობას. ჩვენ უკვე ვეწვიეთ საჯარო სკოლებს ნაძალადევის, ჩუღურეთისა და გლდანის რაიონებში. ვფიქრობთ, რომ ერთობლივი ძალისხმევით მნიშვნელოვან შედეგებამდე მივალთ“, - განაცხადა გივი მიქანაძემ.

როგორც აკაკი ალადაშვილი განაცხადა, თბილისის სხვადასხვა რაიონში სასკოლო ინფრასტრუქტურის გაცნობის პროცესი გაგრძელდება.

„საბურთალოს რაიონში 5 საჯარო სკოლას ვესტუმრეთ. გავეცანით, თუ რა გამოწვევები აქვთ მათ და ვიმსჯელეთ მათი გადაჭრის გზებზე. ჩვენი მიზანია, ბავშვებს ჰქონდეთ კარგი მომავალი და უსაფრთხო და კომფორტულ სკოლებში სწავლობდნენ“, - განაცხადა აკაკი ალადაშვილმა.

საბურთალოს რაიონის სკოლებში გივი მიქანაძესთან და აკაკი ალადაშვილთან ერთად იმყოფებოდნენ: განათლების, მეცნიერებისა და ახალგაზრდულ საქმეთა კომიტეტის წევრი ლიკა შარტავა, განათლების, მეცნიერებისა და ახალგაზრდობის მინისტრის მოადგილეები თამარ მახარაშვილი და გიორგი ჯინჭარაძე, სსიპ საგანმანათლებლო და სამეცნიერო ინფრასტრუქტურის განვითარების სააგენტოს დირექტორი ირაკლი კუპრავა, საბურთალოს რაიონის გამგებელი გიზო ვასაძე და ადგილობრივი მუნიციპალიტეტის წარმომადგენლები.