დიასპორისა და კავკასიის საკითხთა კომიტეტის თავმჯდომარე ირაკლი ზარქუა მონტენეგროს დიასპორის მინისტრს მირსად აზემოვიჩს შეხვდა.

შეხვედრაზე საქართველოსა და მონტენეგროს შორის ორმხრივი ურთიერთობები განიხილეს. მხარეებმა სხვადასხვა მიმართულებით სამომავლო თანამშრომლობის პერსპექტივებზე ისაუბრეს.

„შეხვედრაზე ბევრი საინტერესო თემა განვიხილეთ. ვისაუბრეთ დიასპორასთან დაკავშირებით არსებულ გამოწვევებზე. სტუმრებს დიასპორასთან მიმართებაში ჩვენი ქვეყნის პოლიტიკა გავაცანით. თავის მხრივ, მათაც გაგვიზიარეს საკუთარი ქვეყნის გამოცდილება. ჩვენს ქვეყნებს ბევრი საერთო აქვთ. შეგახსენებთ, რომ მონტენეგრო, ისევე როგორც საქართველო, ევროკავშირის წევრობის კანდიდატი ქვეყანაა. ასევე ვისაუბრეთ თუ როგორ შეიძლება გავხდეთ ევროკავშირის ღირსეული წევრები“, - განაცხადა ირაკლი ზარქუამ.

შეხვედრას ასევე ესწრებოდნენ: დიასპორისა და კავკასიის საკითხთა კომიტეტის თავმჯდომარის პირველი მოადგილე გივი ჭიჭინაძე, კომიტეტის წევრი ნოდარ ტურძელაძე, საგარეო საქმეთა მინისტრის მოადგილე ვლადიმერ კონსტანტინიდი, სამინისტროს დიასპორასთან ურთიერთობის დეპარტამენტის დირექტორი მუხრან გულაღაშვილი და პრემიერ-მინისტრის მრჩეველი დიასპორისა და კულტურის საკითხებში ბექა ოდიშარია.