კულტურის კომიტეტის თავმჯდომარის პირველი მოადგილე ეკა ჭიჭინაძე სომხეთის ელჩს შეხვდა
პარლამენტის კულტურის კომიტეტის თავმჯდომარის პირველი მოადგილე ეკა ჭიჭინაძე საქართველოში სომხეთის რესპუბლიკის საგანგებო და სრულუფლებიან ელჩს, აშოტ სმბატიანს შეხვდა.
შეხვედრაზე მხარეებმა ორ ქვეყანას შორის კულტურული ურთიერთობების გაძლიერებისა და სამომავლო თანამშრომლობის პერსპექტივები განიხილეს.
განსაკუთრებული ყურადღება დაეთმო გამოფენებისა და კულტურული ღონისძიებების ორგანიზებას როგორც საქართველოში, ისე სომხეთში. გამოითქვა მოსაზრება ქართველი და სომეხი სახალხო არტისტების - სოფიკო ჭიაურელისა და ფრუნზიკ მკრტჩიანის შემოქმედებისადმი მიძღვნილი გამოფენის გამართვის თაობაზე.
ასევე, განიხილეს პროექტი „ქალები კულისებს მიღმა“, რომელიც მიზნად ისახავს ქალების როლის გაძლიერებას და მათი შემოქმედებითი საქმიანობის ხელშეწყობას.
შეხვედრის ფარგლებში მხარეებმა გამოთქვეს მზადყოფნა გააღრმაონ კულტურული კავშირები და ხელი მოაწერონ შესაბამის შეთანხმებებს, რომლებიც ორ ქვეყანას შორის კულტურის სფეროში თანამშრომლობის ახალ ეტაპს ჩაუყრის საფუძველს.
