ნდობის ჯგუფის წევრებმა, პარლამენტის რეგლამენტის 157-ე მუხლის შესაბამისად, სახელმწიფო უსაფრთხოების სამსახურის საჯარო სამართლის იურიდიული პირის - საქართველოს ოპერატიულ-ტექნიკური სააგენტოს უფროსს ბექა მამარდაშვილს მოუსმინეს. სააგენტოს ხელმძღვანელმა ჯგუფის წევრებს საჯარო სამართლის იურიდიული პირის – საქართველოს ოპერატიულ-ტექნიკური სააგენტოს მიერ 2025 წელს განხორციელებული საქმიანობის სტატისტიკური და განზოგადებული ანგარიში გააცნო.

ბექა მამარდაშვილმა ჯგუფის წევრებთან ფარულ მეთვალყურეობაზე, მასთან დაკავშირებულ ღონისძიებებსა და საგამოძიებო მოქმედებებზე ისაუბრა. შეხვედრაზე განიხილეს ისეთი მიმართულებები, როგორიც არის სახელმწიფო უწყებების და დაწესებულებების საინფორმაციო-ტექნოლოგიური უზრუნველყოფა, სასაზღვრო ტექნოლოგიების განვითარება და უსაფრთხოების სისტემების მხარდაჭერა.

„ოპერატიულ-ტექნიკურ სააგენტოში აქტიურად ინერგება თანამედროვე საინფორმაციო ტექნოლოგიები. სააგენტოს თანამშრომლები ოპერატიულ და მყისიერ რეაგირებას ახდენენ ნებისმიერ ინციდენტზე, რომელიც სახელმწიფო უწყებებში ხდება. შეხვედრაზე ინფორმაციული უსაფრთხოების საკითხებზე ვისაუბრეთ, სააგენტოს სამომავლო გეგმები და პერსპექტივები განვიხილეთ“, - აღნიშნა ნდობის ჯგუფის თავმჯდომარემ ალექსანდრე ტაბატაძემ.

ოპერატიულ-ტექნიკური სააგენტოს სტატისტიკურ და განზოგადებულ ანგარიშს ნდობის ჯგუფის წევრები: არჩილ გორდულაძე, თენგიზ შარმანაშვილი და ვიქტორ ჯაფარიძე გაეცნენ.