სპორტის კომიტეტის თავმჯდომარის პირველმა მოადგილემ შოთა ხაბარელმა ძიუდოში მსოფლიოს ორგზის ჩემპიონს და ოლიმპიური თამაშების ვიცე-ჩემპიონს, თემურ ხუბულურს 70 წლის იუბილესთან დაკავშირებით, პარლამენტის სპორტის კომიტეტის სახელით, მადლობის სიგელი გადასცა.

ეროვნული ოლიმპიური კომიტეტის მუზეუმში გამართულ ღონისძიებაზე შოთა ხაბარელმა ვეტერან სპორტსმენს ქართული სპორტის განვითარებაში შეტანილი მნიშვნელოვანი წვლილისთვის მადლობა გადაუხადა და მის სპორტულ მიღწევებზე ისაუბრა.

„სპორტული საზოგადოებისთვის დღეს მნიშვნელოვანი დღეა. გამოჩენილ ძიუდოისტს, თემურ ხუბულურს 70 წელი შეუსრულდა. სპორტის კომიტეტის სახელით მსურს მას იუბილე მივულოცო. წლების წინ ჩვენ ერთად ვასპარეზობდით ტურნირებსა და შეჯიბრებებში და ვხედავდი, თუ როგორი შემართებით გამოდიოდა და ასახელებდა ქვეყანას. სწორედ ასეთ ადამიანებზე დგას ქართული სპორტი. მომავალმა თაობებმა მისგან უნდა აიღონ მაგალითი და განავითარონ სპორტის სახეობები“, - განაცხადა შოთა ხაბარელმა.

თემურ ხუბულურის საიუბილეო ღონისძიებას ეროვნული ოლიმპიური კომიტეტის პრეზიდენტი და ვეტერანი სპორტსმენები დაესწრნენ.