პარლამენტის სოფლის მეურნეობის კომიტეტმა სურსათის ეროვნულ სააგენტოში გასვლითი სხდომა გამართა, სადაც სააგენტოს 2025-2026 წლების საქმიანობის ანგარიში მოისმინა.

ანგარიში სხდომაზე სურსათის ეროვნული სააგენტოს უფროსმა გიორგი იაკობაშვილმა წარადგინა. მან კომიტეტის წევრებს სააგენტოს საქმიანობის ძირითადი მიმართულებები გააცნო და სურსათის უვნებლობის, ვეტერინარიისა და მცენარეთა დაცვის მიმართულებით განხორციელებულ ღონისძიებებზე ისაუბრა.

მომხსენებელმა ყურადღება ინფრასტრუქტურულ პროექტებზე გაამახვილა.

როგორც მან აღნიშნა, 2026 წელს სააგენტომ გააქტიურა არარეგისტრირებული საწარმოების კონტროლი. ქვეყნის მასშტაბით განხორციელებული მოკვლევის შედეგად, სააგენტოს ინსპექტორებმა 105 არარეგისტრირებული წარმოება გამოავლინეს, მათ შორის რძის გადამამუშავებელი საწარმოები, საქონლის და ფრინველის სასაკლაოები, კვების ობიექტები, პესტიციდების და აგროქიმიკატების მაღაზიები.

სურსათის ეროვნული სააგენტოს უფროსის თქმით, აქტიურად მიმდინარეობს სააგენტოს მომსახურების გაციფროვნების პროცესი.

კომიტეტის გასვლით სხდომას გარემოს დაცვისა და სოფლის მეურნეობის მინისტრი დავით სონღულაშვილი და მინისტრის მოადგილე ლაშა ავალიანი ესწრებოდნენ.

სოფლის მეურნეობის კომიტეტის თავმჯდომარემ გელა სამხარაულმა სააგენტოს მიერ გაწეული საქმიანობა დადებითად შეაფასა.

კომიტეტმა წარმოდგენილი ანგარიში ცნობად მიიღო.